Hrossaræktandi frá unga aldri
Áhuginn á hestum hefur alla tíð fylgt Baldvini og tíu ára gamall keypti hann og tamdi fyrstu hryssuna sína. Hún hét Sokka 3069 frá Sólheimagerði.
Baldvin er menntaður búfræðingur frá Hvanneyri og rekur bú sitt ásamt Brynhildi konu sinni sem jafnframt er kennari. Bústofninn samanstendur af hrossum og fé. Baldvin og Brynhildur eiga tvö uppkomin börn og nú eru það barnabörnin sem njóta leiðsagnar afa og ömmu í Torfunesi.
Á löngum ferli í hestamennsku, hefur hann ræktað, alið upp og tamið mörg úrvalshross sem vakið hafa eftirtekt meðal hestafólks og unnið til fjölmargra verðlauna fyrir hæfileika og byggingu.
Baldvin er mikilsvirkur í félagslífi bænda og hestamanna. Hann hefur setið í stjórn ræktunarfélaga og starfað innan bændasamtakanna af margvíslegum málum um árabil.
Baldvin Kr. bóndi í Torfunesi er mikil félagsvera. Endalaust er honum falinn trúnaðarstörf að hálfu samferðarmanna sinna og tekur oft við þeim trúnaði.
Nú er hann formaður Þjálfa, hestamannafélagsins í Þingeyjarsýslum. Hann er formaður Hrossaræktarsambands Eyfirðinga og Þingeyinga. Þá er hann fulltrúi hrossabænda á Bændaþingi og formaður sóknarnefndar í sinni heimasókn.
Söngur. Aukabúgrein Baldvins í Torfunesi
Sönglistin hefur í langan tíma verið aukabúgrein Baldvins og hefur hann sungið víða. Lengi söng hann með Baldri bróðir sínum og enn syngja þeir saman af og til við ýmis tækifæri, jafnt í gleði og sorg.
Þeir bræður gáfu út hljómplötu með söng sínum við undirleik Úlriks Ólasonar píanóleikara fyrir rúmum áratug. Baldvin hefur á seinni árum sungið meira einn en einnig tekið þátt í óperuuppfærslum á Laugaborg og á Akureyri, nú síðast í Sígaunabaróninum í fyrravetur.
Sígild íslensk sönglög
Baldvin gaf út geisladisk með söng sínum 1996 ásamt Juliet Folkner píanóleikara, Reyni Jónassyni harmonikkuleikara og Símon Kúran fiðluleikara. Um þetta leyti stundaði Baldvin söngnám hjá Jóni Þorsteinssyni óperusöngvara.
Á disknum eru þekkt vinsæl sönglög frá ýmsum tímum síðustu aldar og er hann meðal annars til sölu í Torfunesi en einnig er hægt að panta hann í póstkröfu, gegnum tölvupóstinn hér á vefsvæðinu.